Сарыағаштағы дау аудан шеңберінен шығып, халықаралық деңгейге жетті. Себебі аудан әкімі Арман Абдуллаев бес елге сусын экспорттап отырған отандық компанияның жерін тартып алмақ көрінеді.
Осыдан кейін Қытай, Өзбекстан, Қырғызстан, Тәжікстан және Моңғолия елдерінен қазақстандық кәсіпорынды қолдаған видеоүндеулер түсе бастаған. Бір аудан әкімінің шешімі елдегі бизнес ахуалына әсер етіп, шетелдік серіктестерді де алаңдатып отыр.
Президент Қасым-Жомарт Тоқаев Үкімет пен бизнес тығыз байланыста жұмыс істеуі керек екенін бірнеше рет айтқан еді. Ал Сарыағашта отандық кәсіпкерге қолдау көрсетудің орнына, оның жерін тартып алу қаншалықты орынды?
Кәсіпкердің айтуынша, компанияға қысым күшейіп, дамуына кедергі келтіріліп жатыр. Тіпті әкімдік ауыл тұрғындарын кәсіпкерге қарсы қойып, ауыз су мәселесінің нақты себебін басқа жаққа бұрған көрінеді.
Брифингте кәсіпкерді шақырдық дегенімен, кәсіпкер тарапы ешқандай шақырту болмағанын айтады. Сонда ел алдында айтылған сөз бен шындық неге қабыспайды?
Арман Абдуллаев бұған дейін де кәсіпкерлермен дауға қалған. Бірінде басына бөтелке тигені белгілі. Енді Сарыағашта да ірі кәсіпорынға кедергі келтіріп отыр деген күдік күшейді.
Сонда мұның артында шынымен халықтың қамы тұр ма, әлде дайын тұрған бизнеске көз тігу бар ма?
Ал жақында «кетем» деп отырған әкім енді қай жақтың кәсіпкерлеріне ойран салмақ?
Бұл мәселе біздің редакцияның бақылауында болады.
