Алматыда 17 қараша – Халықаралық студенттер күніне орай Алматы қаласы Жастар саясаты басқармасының қолдауымен ALMATY STUDENT WEEK апталығы аясында «Ең үздік студенттік топ — 2024» байқауының финалдық кезеңі өтті.
Байқау Алматыдағы ЖОО және колледж студенттерінің басын бір ортаға біріктірді. Байқауға қатысу үшін 30-дан аса өтінім келіп түсті. Сайысқа жалпы Алматының 300-ден астам студент жастары қатысуға ниет білдірді.
Байқау шарты бойынша алғашқы кезеңде студенттік топтар портфолио жинап, топ жетістіктері мен сабақ үлгерімдері бойынша бағаланды. Финалдық кезеңде студенттік топтар өз оқу орны мен мамандықтарын таныстырып, әлеуметтік жобаларын қорғады. Финалдық кезеңге үздік деп танылған 17 топ қатысты.
Байқау қорытындасы бойынша Алматы мемлекеттік бизнес колледжінің «BusinessLAB» студенттік тобы қаланың «Ең үздік студенттік тобы» болып танылды. Ал II орынды Қазақ ұлтық аграрлық университетінің «DreamTeams» студенттік тобы, III орынды Қазақ ұлттық қыздар педагогикалық университетінің «Histrue» студенттік тобы иеленді. Жеңімпаздар дипломдар мен ақшалай сертификаттармен марапатталды.
Алматы қаласы Жастарды әлеуметтендіру және жастар бастамаларын қолдау бөлімінің басшысы Бекқайыров Нұрсұлтан Болатұлы «Ең үздік студенттік топ» байқауының деңгейінің өсіп жатқанын айтып, барша қатысушылар мен кеш қонақтарына өз алғысын білдірді
«Құрметті, жастар! Сіздерді халықаралық студенттер күнімен шын жүректен құттықтаймыз! Алматы қаласында өткізіп жатқан студенттік кездеріңіз әрдайым естеріңізде қалатындай қызықты әрі пайдалы, сапалы болуына Жастар саясаты басқармасы жұмыс жасап жатырмыз. Халықаралық студенттер күніне арналған «Almaty student`s week» апталығы аясында ұйымдастырылған «Ең үздік студенттік топ» жобасы ең үлкен шаралардың бірі. Бүгінгі іс-шарада жеңіске жеткен барлық топтарды шын жүректен құттықтаймыз!»
Екінші жыл қатарынан өткізіліп жатқан бұл дәстүрлі шара қаламыздың талантты және білімді студент жастарын анықтауға үлкен мүмкіндік беруде. Ұйымдастырушылардың айтуы бойынша, бұл сайыс келесі жылы да жалғасын таппақ.
