Америкалық конгрессмендер екі жылға созылған тергеудің нәтижесінде коронавирус, ең ықтимал жағдайда, зертханада пайда болған және оның таралуы зертханалық ақаудан туындаған деген қорытындыға келді. Бұл туралы АҚШ Өкілдер палатасының қадағалау комитетінің коронавирусқа қатысты кіші комитетінің есебінде айтылған.
“COVID-19 вирусы, ең ықтимал жағдайда, Қытайдың Ухань қаласындағы зертханадан шыққан”, – делінген құжатта.
Заң шығарушылар бұл нұсқаны қолдайтын бес дәлел келтіреді. Олар вирустың табиғатта кездеспейтін биологиялық ерекшеліктері бар екенін айтады. Сонымен қатар, коронавируспен алғаш жұқтырғандардың бәрі бір адамнан басталғанын, ал бұрынғы пандемияларда таралу ошақтарының әртүрлі болғанын атап өтеді.
Есепте SARS вирусын зерттеуге маманданған Ухань зертханасы да аталады. Конгрессмендердің мәлімдеуінше, зертханада “биологиялық қауіпсіздік деңгейі жеткіліксіз жағдайда” зерттеулер жүргізілген.
“2019 жылдың күзі, яғни жабайы жануарлар базарында COVID-19 анықталуына бірнеше ай қалғанда, Ухань вирусология институтының қызметкерлері коронавирусқа ұқсас вирусты жұқтырып ауырған. Барлық ғылыми деректер бойынша, егер вирустың табиғи жолмен пайда болғанын растайтын дәлелдер болғанда, олар әлдеқашан табылған болар еді”, – делінген есепте.
