Оңтүстік Кореяда тергеушілер уақытша шеттетілген, бірақ елдің қазіргі президенті Юн Сок Ельді қамауға алды, — деп хабарлайды qulaq-24.kz тілшісі Yonhap басылымына сілтеме жасап.
«Басқарма президент Юн Сок Ельді бүлікке басшылық жасады деген айыппен қамауға алды», — деп жазылған агенттік хабарламасында.
15 қаңтарда таңертең тергеушілер тұтқындау үшін мемлекет басшысының резиденциясына барған, бірақ президенттің қауіпсіздік қызметіне қарсы шықты. Шамамен 2,5 сағаттан кейін баспалдақтарды қолданып, полиция мен сыбайлас жемқорлықты тергеу басқармасының қызметкерлері резиденцияға кірді.
Операцияға 200-ге жуық полиция мен 40 тергеуші қатысты.
Кейінірек Юн Сок Ель қайғылы оқиғалардың алдын алу үшін жауап беруге өзі баруға шешім қабылдағаны белгілі болды. Юн Сок Ельдің резиденциясын күзететін әскери бөлімшелер қамауға алу ордерін орындау кезінде тергеушілерге кедергі жасамауға келісті.
3 қаңтарда Оңтүстік Корея тергеушілері уақытша шеттетілген президентті тұтқындау туралы бұйрықты орындауға тырысты, бірақ президенттік күзетпен бес сағаттан аса қарсыласқаннан кейін берілуге мәжбүр болды.
Юн Сок Ель көтеріліс жасады және билікті асыра пайдаланды деп айыпталып отыр, өйткені ол елде әскери жағдай енгізді, сондай-ақ, Парламентке әскер жіберді.
Бұған дейін не болды?
Айта кетейік, 2024 жылы 3 желтоқсанда кешке Оңтүстік Корея президенті Юн Сок Ель төтенше әскери жағдай жариялады. Бұл шешім оппозициялық Демократиялық партия Парламентте қысқартылған бюджет туралы заң жобасын қолдап, мемлекеттік аудитор мен бас прокурорға импичмент жариялау туралы өтініш бергеннен кейін қабылданды. Алайда Оңтүстік Кореяның Ұлттық Ассамблеясы елде әскери жағдай енгізілуіне қарсы дауыс берді.
Дауыс беру кезінде Ұлттық ассамблея ғимаратында әскери жағдайды жоюды талап еткен азаматтар әскери адамдармен, полициямен қақтығысып қалды. Сеул көшелерінде әскери техника пайда болды.
Кейін ел президенті төтенше әскери жағдайды алып тастайтынын мәлімдеді.
Қазақстанның Корея Республикасындағы елшілігі қазақстандықтарға үндеу жасады. Қазақстан азаматтары төтенше жағдай кезінде жедел байланыс үшін мына нөмірлерге хабарласа алады: +8210-6572-9311.
Сонымен қатар Оңтүстік Корея президентінің аппараты отставкаға кететінін мәлімдеді.
Ал Қазақстанның сыртқы істер министрінің орынбасары Әлібек Бақаев Оңтүстік Кореяда қанша қазақстандық барын айтты.
Кейінірек Оңтүстік Кореяның қорғаныс министрі де отставкаға кететінін мәлімдеді. Осылайша Қазақстан мен Оңтүстік Корея қорғаныс министрлерінің 5 желтоқсанға жоспарланған келіссөзі өткізілмеді. Ал полиция Оңтүстік Корея президентіне қарсы тергеуді бастады.
