Жүктіліктің соңғы апталарында күтпеген асқыну, шала туған сәби немесе анасының өміріне қауіп төнген күрделі жағдай. Мұндай сәтте дәрігерлер үшін уақыттың әр минуты маңызды. Алматы облысының Есік қаласындағы №1 перинаталдық орталықта дәл осындай күрделі жағдайдағы әйелдер мен жаңа туған нәрестелерге медициналық көмек көрсетіледі.
Мұнда пациенттерді қабылдаудан бастап, шұғыл операция жасауға, реанимациялық көмек көрсетуге және жаңа туған нәрестені күтуге дейінгі медициналық процестің негізгі кезеңдері бір орталықта ұйымдастырылған.
Жыл басынан бері орталықта 1190 әйел босанды. Олардың арасында мерзімінен бұрын босанған 132 әйел бар. Асқынған жағдайларда дәрігерлер 206 шұғыл және 168 жоспарлы операция жасаған.
Орталықтың ерекшелігі – күрделі жағдайларда мамандардың бір команда болып жұмыс істеуі. Анестезиология, реанимация және қарқынды терапия бөлімінде биыл 414 пациентке көмек көрсетілген. Олардың арасында ауыр преэклампсия, артериялық гипертензия және басқа да қосымша аурулары бар жүкті әйелдер болды.
«Ана мен баланың жағдайы күрделенген кезде бір ғана дәрігердің шешімі жеткіліксіз. Мұнда акушер-гинеколог, анестезиолог-реаниматолог, неонатолог және басқа мамандар бір сәтте бір команда ретінде әрекет етеді. Біздің міндетіміз – ең қиын жағдайда да ана мен балаға қажетті көмекті уақытында көрсету», – дейді орталық директоры Дәурен Иманалиев.
Перинаталдық орталықтың жұмысы тек Есік қаласымен шектелмейді. Алматы облысының аудандарынан медициналық көмекке мұқтаж әйелдер мен жаңа туған нәрестелер де осында жолданады. Осылайша орталық өңірдегі ана мен бала денсаулығын қорғау жүйесінде күрделі жағдайларды қабылдайтын маңызды медициналық буындардың біріне айналып отыр.
Жаңа туған нәрестелерге арналған бөлімшелерде де заманауи медициналық көмек көрсетіледі. Биыл мұнда салмағы 500 грамнан 1 килограмға дейінгі өте төмен салмақта туған 16 нәресте медициналық бақылау мен ем алды. Мұндай сәбилерді күту – медицинадағы ең күрделі бағыттардың бірі.
Орталықта әйелдер денсаулығына қатысты хирургиялық көмек те көрсетіледі. 16 төсектік гинекология бөлімшесінде жатыр миомасы, жатырдан тыс жүктілік, аналық без кистасы және басқа да гинекологиялық патологияларға операциялар жасалады.
Ал медициналық көмектің мүмкіндігін одан әрі кеңейту үшін орталықтың материалдық-техникалық базасын жаңарту жоспарланып отыр. Жаңа жабдықтардың қатарында лапароскоп, цифрлық рентген аппараты, жасанды тыныс алу аппараттары, кювездер және генетикалық анализаторлар бар.
Бұл – бір ғана медициналық ұйымның жаңаруы емес. Бұл Алматы облысында ана мен балаға көрсетілетін көмекті жаңа деңгейге көтеруге бағытталған нақты қадам.
